【NGO】4個與義工合作更好嘅小Tips
招募義工對唔少NGO嚟講一啲都唔陌生。義工嘅每一份努力都為NGO帶嚟幫助。但不時都會聽到機構同義工之間因為溝通不足，令雙方出現期待落差，甚至鬧得不愉快。
其實呢個情況並唔罕見。但其實會唔會有一啲實用嘅行動NGO可以嘗試，減少可能出現嘅誤會，令合作過程更順利、更完滿呢？
目錄
（一）機構對義工要有咩睇法
（二）招募前做好準備 避免義工「無所事事」！
（三）有效支援義工 Briefing好重要！
（四）義工服務完成後 NGO有咩要做？
（五）義工配對平台Time Auction 幫你搵到技能義工
（一）機構對義工要有咩睇法
首先，機構對義工嘅取態好重要，直接影響義工幫手嘅投入度同成果。機構應該重視義工嘅貢獻，了解佢地同樣為機構著想去出一分力，並明白義工非「免費勞工」。機構亦應該將呢個訊息傳達畀機構同事。為左有效管理義工，機構可提供培訓畀全職員工，令機構員工了解義工與全職同事係一種合作同信任嘅關係。互補不足、相互支持鼓勵。機構亦應授權全職同事作出友善指導，適時管理義工並確保有足夠溝通、進度跟進，避免全職同事向義工分配工作感到「綁手綁腳」或無禮地「呼喝命令」。當然，亦應提醒同事要保持禮貌。
（二）招募前做好準備 避免義工「無所事事」！
招募義工前，應先清楚了解機構現時需招募咩類型嘅義工幫手，例如，拍攝好手（Photographer Volunteer）、設計人才（Design Volunteer）、活動策劃搞手（Event Support / Workshop Facilitator）；並且喺招募嘅宣傳品上清楚寫出項目背景，及義工需要幫手嘅內容細節，假設機構想搵活動策劃搞手，就可以列明要搞咩類型嘅活動、活動嘅持續時間、規模，以及需要搞手負責嘅細節等。咁搵緊義工嘅朋友，就可以根據自己嘅經驗同能力，考慮係咪勝任呢個義工機會，機構亦更容易更快地搵到適合嘅人才啦。
義工都希望喺服務過程期間，有充實嘅體驗。人手不足，會令義工工作量過大。同時，人手過剩，義工服務期間就會「無所事事」，義工難以從中得到體驗同感受。所以，機構務必要係招募前，先好好規劃所需人手同負責嘅工作細節！
（三）有效支援義工 Briefing好重要！
點樣畀到支援義工，令佢哋順利完成工作亦不容忽視。機構宜喺工作開始前給予義工清晰嘅工作指引—進行簡介會（briefing）絕對會係一個好方法。簡介會中除向義工講解所需工作時間、地點等基本資訊外，更重要係讓義工清楚了解工作內容。機構可向義工介紹機構服務宗旨同工作計劃目的，咁可以令義工容易了解應該點做係最幫到機構，令雙方達成一致嘅期望管理（Expectation Management）。假設機構為SEN兒童舉辦工作坊，想招募義工設計師設計海報。機構可向義工設計師說明工作坊嘅目的，例：係以快樂嘅氛圍下，鼓勵SEN兒童接觸不同事物及發展言語技巧。咁設計師就可將海報設計成較有活力、色彩繽紛以吸引對應群組參加。另外，簡介會亦可以畀義工感受到自己喺團隊中嘅價值同崗位嘅重要性，有助提升義工嘅自信心同工作熱情。
（四）義工服務完成後 NGO有咩要做？
義工辛勞工作後，機構都可以有唔少行動可以做。機構不妨同義工嚟個debriefing，除左表達對義工嘅感謝外，亦可以了解佢哋嘅工作體驗，聽下佢哋喺整個義工體驗嘅感受，幫助機構更好了解義工嘅需求同期望。可以知道點樣改善義工嘅體驗之餘，亦可以令義工感受到機構對佢哋嘅尊重。如果資源許可，可向義工提供証書及津貼，表揚佢哋嘅貢獻。同時，亦可以借呢個機會邀請義工參與其他項目或活動，下次搵義工就唔使咁辛苦啦！
（五）義工配對平台Time Auction 幫你搵到技能義工
為你嘅NGO招募緊義工嘅你，係咪對與義工合作上多左信心呢。下一步，你可能就想落手搵義工，但同時仲有啲顧慮，例如：搵唔搵到有質素、有技能嘅義工呢？有冇唔同嘅候選義工，畀我揀到最合適嘅人選呢？咁義工配對平台Time Auction就幫到手啦。
Time Auction喺2014年成立，致力推動義工文化，至今已為本地超過710+ NGO招募同配對超過17,100+技能義工！只要你係已註冊嘅慈善機構（S88）或非牟利機構（Cap 151），歡迎你同我地book一個call，了解點樣可以免費係Time Auction平台招募技能義工幫手啦！
